صائم بلتستانی کی غزل

چاند جوبن پہ تھا تاروں نے بہت رقص کیا چاندنی رات تھی پھولوں نے بہت رقص کیا میرا دشمن ہے شرمسار مجھے دے کے شکست پر مری مات پہ یاروں نے بہت رقص کیا اس نے دریا میں محبت سے گرایا پتھر رات بھر وجد میں لہروں نے بہت رقص کیا کون کہتا ہے فقط میں نے ہی ڈالی ہے دھمال عشق کے نام پہ دونوں نے بہت رقص کیا کیا بتاؤں میں تجھے لذت مستی کا سرور ہاتھ جب رک گئے قدموں نے بہت رقص کیا کتنی مشکل سے بسر کی ہے خدا جانتا ہے گھر کی دہلیز پہ فاقوں نے بہت رقص کیا صائم آکاش پہ آوارہ ستاروں کی طرح اس کے رخسار پہ زلفوں نے بہت رقص کیا صائم بلتستانی